قبریں اور دیگر کہانیاں

قبریں اور دیگر کہانیاں

youth-yell

مزید مائیکرو فکشن پڑھنے کے لیے کلک کیجیے۔
قبریں
قبرستان میں بھی کتنی تفریق ہے،
امیر لوگوں کی قبریں،
عالیشان قبریں۔
کسی قبر کا تعویز سنگ مرمر کا تو کسی کا سنگ سرخ کا،
لوح پہ تحریر خوش نویس کاتبوں کے ہاتھ کی،خوش نما رنگوں سے مزین۔
درمیانے طبقے کی قبریں سیمنٹ کا تعویز اوپر چونے کا لیپ،ادھ مٹی لوح،شکستہ ادھ مٹے حروف،
جو پڑھے نہیں جا سکتے
غریب کچی قبریں،
بے سروسامان،بے نام و نشا ن جیسے ان کا کوئ والی وارث نہیں۔
رنگو گورکن جب رات کو
قبریں کھود کر ہڈیاں چراتا ہے،
حکیم بندو خان کو بیچنے کے لئے
تونہ جانے کیوں
ان سے نکلنے والےسب ڈھانچے
ایک جیسے ہوتے ہیں۔
رات
رات جب گاؤں کی گلیوں میں اترتی
تو وہ ایک زندہ رات ہوتی
طاقچے میں دیا روشن ہوتا
دیےکی لو پھڑپھڑاتی
روشنی آنگن میں رقص کرتی
بچپنے کا کھلنڈرا پن
ہم شور مچاتے آنگن میں کھیلتے
خوب ادھم مچتا
آوازوں کا شور آسمان سر پہ اٹھا لیتا
اب بڑھاپے کی دہلیز پہ
شہر کی اداس تنہا راتیں ہیں
ایک مردہ سی چکا چوند ہےاور
یادوں میں کہیں
ایک دیا اور ایک طاقچہ زندہ ہے
علاج
اس کے پاؤں کے تلوے ساری ساری رات جلتے رہتے، سوئے سوئے لگتا جیسے اس کے تلووں سے کسی نے دہکتے ہوئے انگارے چپکا دیئے ہوں۔حلق سوکھ کے کانٹا ہو جاتا ، زبان تالو سے چپکی رہتی، آنکھوں کی بینائی دھیمی پڑتی جا رہی تھی، رات کو پیشاب کے لیے بار بار اٹھنا پڑتا ، اس کی رات کی نیندیں حرام ہو چکی تھیں۔ شوگر نے اس کی زندگی اجیرن کر دی تھی۔ وہ پیر جی کا مرید تھا، پیر جی شوگر کے لیے چینی دم کرتے تھے۔ اس نے دم کی ہوئی چینی خوب کھائی، اس کی تمام تکلیفیں دور ہو گئیں۔۔۔۔ اب آرام سے قبر میں لیٹا ہے۔

Related Articles

انیقہ قتل کیوں ہوئی؟

کسی بھی ریاست کی ترقی کا دارومدار اُس کے کے باشندوں کی انفرادی کارکاردگی پر منحصر ہے۔

ریکارڈ ساز خادم اعلٰی سے ایک اپیل

ہمارے شہنشاہِ پنجاب المعروف خادم اعلیٰ کو ہر سال کوئی نہ کوئی نیا مشغلہ سوجھتا ہے اور اس شوق کو پورا کرنے کے لئے وہ اپنی پوری کی پوری سلطنت کو اس شوق کی تکمیل پر لگا دیتے ہیں۔

سماجی مظاہر اور لینن ازم

لنگر کا اصول تھوڑا الگ ہے کہ کسی کو دعوت نہیں دی جاتی لوگ مرضی سے آتے، کھاتے اور چلے جاتے ہیں اور ادائیگی کا بھی کوئی تصور نہیں