وہ سازش ڈھونڈ رہے تھے

وہ سازش ڈھونڈ رہے تھے

کسی خفیہ راستے کی تلاش میں
انہوں نے سرکنڈوں کی بنی دیواروں پر
لپی ہوئی مٹی کھرچ ڈالی
اور تیل کا چولہا الٹ کر انہیں جلا دیا
چھاونی کے نقشے ڈھونڈنے کو
تھکے ہوئے جسموں پر منڈھا ہوا چمڑہ ادھیڑ کر
ہڈیوں میں سوراخ کیے
تاکہ رستا ہوا گودہ
بغاوت کے جراثیم ٹیسٹ کروانے
دارلحکومت بھیجا جا سکے
میلی چادریں بوٹوں تلے کچلیں
ادھڑے ہوئے گریبانوں میں
رال سے لتھڑے ہوئے ہاتھ ڈال کر
سوکھی ہوئی چھاتیاں ٹٹولیں
فاقہ زدہ پیٹوں کو بندوقوں کے دستوں سے ٹھونک
کر ان کے خالی ہونے کا اندازہ لگایا
پھٹے ہوئے جوتے سے جھانکتے ناخن کھینچ کر
ان کے اصلی ہونے کا یقین کیا
آنکھوں کی جھیلیں آنسووں سے خالی کروائیں
تاکہ ان کی تہہ میں چھپا ہوا اسلحہ برآمد کر سکیں
قہقہے ضبط کر لیے
اور مسکراہٹوں کے دانت توڑ ڈالے
ادھڑی ہوئی جیبوں میں
غیر ملکی کرنسی کی تلاش سے مایوس ہو کر پلٹے
تو جاتے ہوئے بچوں کے گلک توڑ گئے
جن میں انہوں نے خواب جمع کر رکھے تھے
میں اپنے بیٹے کے ساتھ مل کر
اسکے خواب سمیٹ رہا ہوں
پھر اپنی نظموں کی کتاب ترتیب دوں گا۔۔۔۔
Image: Banksy

Salman Haider

Salman Haider

The author is working as Urdu Editor at Tanqeed. He is a visiting Scholar at University of Texas at Auston and a Blog Writer at Dawn Urdu. He has a profound interest in theater, drama and culture.


Related Articles

کُمہار

گلیوں میں
ٹُوٹے ہوئے برتن
کُمہار کو
اپنے وجود کے ٹُکڑے لگتے ہیں

مجھے ڈوبنا نہیں آتا

ایچ- بی- بلوچ: میں بولنا بھی نہیں جانتا
کیا تم نے کبھی خاموش کنویں دیکھے ہیں؟
جن میں سے
کائی اگ آتی ہے
جو شہر بھر کے گند اور گناہوں میں
چپکے سے شریک ہوجاتے ہیں

روہنگیا جاگتا رہ

علی زیرک: روہنگیا جاگتا رہ
ابھی اور بھی جسم ہیں جن کی گنتی دھندلکے سے پہلے کی
لوحِ زماں پر رقم کر کے سونا ہے