ضامن عباس کے عشرے

ضامن عباس کے عشرے

عشرہ -- دس لائنوں پر مبنی شاعری کا نام ہے جس کے لیے کسی مخصوص صنف یا ہئیت، فارم یا رِدھم کی قید نہیں. ایک عشرہ غزلیہ بھی ہو سکتا ہے نظمیہ بھی۔ قصیدہ ہو کہ ہجو، واسوخت ہو یا شہرآشوب ہو، بھلا اس سے کیا فرق پڑتا ہے۔ ادریس بابر

مزید عشرے پڑھنے کے لیے کلک کیجیے۔

ع / چاۓکیسی لگی

نہیں
میں تو بس
کہہ رہی تھی کہ وہ
'کیا ہوا'
کچھ نہیں
'کچھ کہو بھی سہی '
اک سہیلی یہ کہتی ہے
آپ اُس سے بھی
خیر ! چھوڑیں اسے
چاۓ کیسی لگی ؟

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ع / ہیجان

میں یہیں ہوں
کہیں بھی نہیں جا رہا
اچھا چپ تو کرو
اک تو چھٹی بھی ختم
اور اوپر سے تم ۔۔۔۔۔۔۔۔۔
یار ۔۔۔۔۔۔۔۔ حد ہو گئی
ٹھیک ہے، بھائی! روتی رہو!
میری بکواس تو ماننی ہی نہیں
تم بس اپنی کرو

اچھا چلتا ہوں میں ۔۔۔۔۔۔۔۔۔۔۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ع/ گُمان

بس ایک چھوٹی سی بحث پر ہی چلے گئے ہو؟
کنارا کر کے
بہت سے دعوے کیے تھے تم نے
کبھی جتایا نہیں مگر میں یہ جانتا تھا
تمام دعوے ہیں وقتی جذبوں کے زیرِ سایہ
تمہیں محبت نہیں ہے مجھ سے، فقط گماں ہے
میں مانتا ہوں کہ پیار آتا تھا مجھ پہ تم کو
سو پیار آنے کو پیار ہونا سمجھ رہے تھے
مگر جو آتا ہے اُس کا جانا بھی طے ہی سمجھو
بس ایک چھوٹی سی بحث پر ہی چلے گئے ہو!

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ع // مردانہ انا

آنکھوں کے پار نمی موجود ہے
کانوں کو تنہائی میسر ہے
کھل کے رونا چاہتا ہوں
کسی فلم کے جذباتی سین دیکھ کر
پھر یہ دیوار کہتی ہے
اپنے ساتھ دھوکہ کر رہے ہو
کیسی طاقتور بے بسی ہے
مجھے اس سے فرار چاہیے
ورنہ دماغ کی نسیں پھٹ جائیں گی
احساس۔مردانگی کے مارے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ع // مجھے لگتا تھا وہ یاد آتے ہیں

شانوں پر خواہشات کی عدم تکمیل کا بوجھ لیے
میں جسے، بچھڑنے کا غم قرار دیتا تھا

پھر مجھے کسی اور سے لگاؤ ہو گیا
ایک دن وہ بھی کسی بات پر مجھے چھوڑ گیا
اب کے میں پر سکون رہا

اب جو لوگ میرے قریب ہیں
وہ کسی بھی وقت چھوڑ کر چلے جائیں گے

اور میں، ابھی سے، ان کے وجود کے بغیر
اپنی دنیا کو مکمل محسوس کرتے ہوۓ

ایک نامکمل مگر نارمل زندگی گزار رہا ہوں
Image: Rene Magritte


Related Articles

بھوک ہڑتال کی مکمل گائیڈ اور دیگر عشرے

جنید الدین: شاہدرہ سے گجومتہ جانے تک
میٹرو کتنا وقت لیتی ہے
نصرت کی تین چار قوالیاں، عطاء اللہ کے پانچ چھ گانوں جتنا

عشرہ // مشعال خان البرٹو روجاز نہیں تھا

جنید الدین: دنیا دلچسپ لوگوں سے خائف کیوں ہے
میں پابلو نرودا نہیں ہوں
مشعال، البرٹو روجاز نہیں تھا

عشرہ / قصہ ء پاک و ہند ما قبلِ قدیم

ادریس بابر: ادھڑی ہوئی جرابیں
اکھڑے ہوئے مسوڑھے
لڑنے کو گھر سے نکلے
ستر برس کے بوڑھے!